(*" نبضــــــــات "*)

[tamer_saleh555]

افتحو المعبر يا مسلمين

هذا هو لسان اهل غزة ، يطلبو وبشدة فى فتح معبر رفح المصرى ، مصر تعتبر الاخت الشيقية لفلسطين ، والشريان النابض لكل حركات التحرير على مر العصور ، لكن مصر تعتبر مقصرة التقصير الشديد فى حق فلسطين وخاصة موضوع معبر رفح ، مش معقولة هنبقى احنا واسرائيل عليهم ، كفاية عليهم حصار شامل من بشر لا يعرفون معنى الرحمة ، ولا يعرفون لمعنى الانسانسة سوى حروفها وترجمتها بلغاتهم، غزة اصبحت تنادى كل البشرية مسلمهما ومسيحها ، غزة اصبحت هيكل عظمى فى انتظار محاليل الجلوكوز ليروى بها عظامه التى اوشكت على التبالى ، والعرب نائمون ، والعرب يفكرون فى كيفية ارضاء العدو الصهيونى والأمريكى ، مصر تحاول على استحياء مد يد العون لاهالى غزة اما بالتهريب او بغض طرف العين عن التجاوازت التى تتم على الحدود ، لكن غزة تحتاج من مصر اكتر من كده ، احنا منتظرين نشوف الايام اللى جاية فيها ايه بخصوص غزة فى اعتقادى مش هيحصل اى تقدم خصوصا ان اسرائيل ما فيش اى ضغوط عليها بل بالعكس بتحاول تفرض سيطرتها ونفوذها حتى فى الاتفاقايات .

بمناسبة الاتفاقية اللى بين مصر واسرائيل بخصوص معبر رفح ، سمعت ان فيه نية امريكية لبناء جدار جديد اسرائيلى ولكن هذه المرة ليس فى فلسطين ، الجدار هيكون جوة مصر فى سيناء على الحدود بينا وبين فلسطين وده بمناسبة عيد تحرير سيناء اللى فى اعتقادى انه لسه محتلة
وسينا رجعة كاملة لينا ومصر اليوم فى عيد

بمناسبة عيد تحرير سيناء هو ليه بننسى ان حرب التحرير للاراضى المصرية بنختصرها كلها فى اول طلعة جوية وننسبها للرئيس مبارك ، معقولة حرب لمدة تسع سنين ( 1973 - 1982 ) اختصرناها فى اول طلعة جوية .

ارجوكو ساعدو اخوانا فى فلسطين ، فلسطين كلها محتاجة اقل مساعدة ، لما محمد ابو تريكة رفع شعار التعاطف مع غزة كانت لفتة طيبة ، ليه مش كل واحد فينا يرفع التعاطف بالمساعدة ولو حتى باقل الاشياء ، الدعاء مش هيكلفنا كتير ما دام بقينا بخلا عليهم بالمساعدة

بمناسبة ابو تريكة محامى مصرى طلب من المحكمة الادارية العليا تعين حراسة مشددة على ابو تريكة ، ومعاملته معاملة السفير يا ترى ليه ؟ اشك انه تعرض لتهديدات خلت المحامى يطلب الطلب ده ، وطبعا وزراة الداخلية ولا هنا خالص ، يعنى ممكن فى يوم وليلة نلاقى خبر وفاة ابوتريكة فى حادث سيارة او حتى عربيته وقعت فى النيل خصوصا انه ساكن فى بولاق يعنى بين لحظة وتانية مش هنلاقى ابوتريكة .

مصر بلد الحضارة والجمال ونقول الفن كمان ، وزير الثقافة المصرى له من التجاوزات ما يكفى لنقده بل واقالته من فترات طويلة ، لكن يبدو انه من اصحاب الصفوة المختارة فى مصر ، لكن ما توصلش اننا فى مصر نستضيف فرقة فنية اسرائيلية فى قلعة قاتباى فى اسكندرية فى شهر مايو المقبل ، ليه الحكومة بتحاول تستفذ مشاعرنا كمصريين كارهين اسرائيل كره العمى ، يمكن التطبيع اللى دخلنا فى عصر اننا نصدر الغاز الطبيعى اللى اساسا مش لاقينه لاسرائيل . بس التطبيع ليه بيكون من جانبنا احنا بس ، ليه ما بيكونش التطبيع ده بياثر على طلباتنا من اسرائيل اتجاه اخوانا فى فلسطين ،اعتقد ان كل طلبات مصر من اسرائيل الخاصة بالقضية الفسطينية قوبلت بالرفض ، طيب احنا احنا بنوافق على كل طلبات اليهود حتى اننا نسضيف فرقة فنية من عندهم وندخلها اشهر قلعات العالم . مصر هتستفيد ايه ؟ بصراحة مش عارف ؟!؟!؟!؟!؟!؟!

رئسينا المبارك سيادة الرئيس مبارك كلها كام يوم ويحتفل بعيد ميلاده معرفش يبقو كام سنة ، المهم ربنا يديله الصحة ويبارك لينا فى عمره يارب ، لكن هل احتفال السنة دى بعيد ميلاد الريس هيكون زى كل سنة خصوصا بعد اختيار يوم 4 مايو لعمل اضراب جديد ؟ اعتقد لا . لان الريس هيكون مشغول ومشغول جدا بتطورات احداث الاضراب
كل سنة وانت طيب يا ريسنا

بمناسبة الاضراب فى احدى جلسات مجلس الشعب الاسبوع اللى فات ده مجموعة من النواب طلبو عمل لجنة تقصى الحقائق طبعا غريبة جدا لجنة تقصى الحقائق غالبا بتكون فى الحروب او الجرائم الكبيرة المهم حاول اغلب الاعضاء جاهدين بتكون اللجنة وبعد المداولات والكلام الكبير من الحزب الحاكم او المعارضة ، وطبعا لحيرة الاعضاء صاحبة القرار اصبحت العيون تتلافت يمين ويسار حتى نظر رجل الاعمال احمد عز وبغمزة عين واحدة صوت جميع الاعضاء على عدم الاعتراف بتكوين لجنة تقصى الحقائق .

استنتجت بحاجة غريبة ان رئيس مصر القادم
هو رجل الاعمال احمد عز

رجال الشرطة فى مصر لهم من التجاوازات ما يمكن لهم من حكم مصر بمطرقة من حديد ، الصور كتير لكن بمناسبة اعياد الربيع والمناسبات اللى مليانة بروايح الفسيخ والرنجة ما حبتش اعكر المزاج الحلو كان اخرها طفل دخل الحبس ظلما وعدوانا بعد ما تمت سرقة باكو شاى من احد المحلات فى المنصورة وبعد هبوب جيش من امناء الشرطة لم يجدوا السارق ووجدو فى طريقهم محمد ممدوح طفل اخر اخذوه على القسم واخذو يذيقوه اشد انواع التعذيب من صعق بالكهرباء وضرب بالحذاء لدرجة الوفاة وبعد تحليل الجثة وجدت عليها اثار التعذيب ومن شهادة الشهود ان حضرة الضابط ضرب محمد بالجزمة فى صدره فخرج الدم من فمه فى الحال
وما زالت القضية معلقة حتى الان